و هاذي كلماتها كتبتها بمجهودي الخاص
مال بن ادم غي مزروب
جاري مور السراب و الكذوب
و الحياة
ماشة جارية
جمعنا فيها غي الذنوب
نفوسنا ما باغيا التوب
راها الدنيا فانية
هكذا عايشين فهاد الدنيا
حتى واحد ما هاني من الهموم
كل واحد فينا عندو ستوريا
عندك مشكيل كاين الي بوبري عندو كوديا
شكون يسب فشكون ؟ البشر ولا الدنيا
جاريين مور الدنيا فحال الي ما عمرها تولي فانية
فحال الي مور الموت غنرجعولا مرة ثانية
العمر يجري ن القدام بالعام و الثانية
يا الي بنيتو القصور..القبور كاملة حانية
بن ادم تالف فالظلام في يده شمعة طافية
فين طريق النور؟فين طريق العافية؟
العيون ديالنا عمات ملي القلوب ولات عامية
القلوب ديالنا عمات ملي اللقمة ما بقات صافية
مابقا حد يقنع بالحلال ياكل خبزة حافية
كلشي ديالنا تخلط كلشي ولا هانية
مابقا لا حيا لا وقار ,اخلاقنا ولات دانيا
بعنا كلشي و الدنيا هي الشارية
مال بن ادم غي مزروب
جاري مور السراب و الكذوب
و الحياة ماشة جارية
جمعنا فيها غي الذنوب
نفوسنا ما باغيا التوب
راها الدنيا فانية
الناس مابقات تشبع و حتى حاجة ما كافية
ولينا ناكلو في بعضنا ,الرحمة كلمة بالية
خسرنا كل نفيس ملي الدنيا ولات غالية
خسرنا مع ابليس بالضربة القاضية
ما بقيناشي نسمعو ملي تغني العين الباكية
مابقيناشي نحسو بللي كوا القلوب شاكية
كل واحد فينا بنا على راسو حيوط عالية
مابقا يد حنين يضمك للاحضان الدافية
ولينا قباح من الشر فحال الحجر حروفنا ماضية
العفة ,الرجلة...حتى حاجة ما ساوية
شوف فين وصلنا و فين الدنيا بنا ماشية
ماشية ن الجحيم و احنا دابا غي فالحاشية
فوقاش غنفيقو نعرفو بلي راها راشية
قرب يفوت الفوت و عيونا باقا غاشية
حيت باقا ما فنا , يعني الفرصة باقية
خسنا نرجعو نالدين و نقراو الحروف الشافية
مال بن ادم غي مزروب
جاري مور السراب و الكذوب
و الحياة ماشة جارية
جمعنا فيها غي الذنوب
نفوسنا ما باغيا التوب
راها الدنيا فانية
هكذا عايشين فهاد الدنيا
ما بقا حد فينا يقد على نفسو الطاغية
غرقنا فالذنوب...شني باقا باغية؟
كنعومو فالمعاصي و كل مرة شنو شاهية
الشاياطين زوقو الدنيا و ردوها زاهية
الراجل مابقا كيف ماكان بالنفس الحامية
ملي خلا المراة تمشي بين الناس عارية
ما بقا حد يربي ولادو على الاخلاق السامية
كلشي ولا فلوس و المبادئ ما بقات عاطية
شوف المحاكيم بين الخوت الدامية
شوف وجه اي ام غتجبر دمعة جارية
الذرية طلعت عاصية؟ولا الحياة رجعات قاسية؟
ولا ملي كانو صغار كانت مع الدنيا مفافيا؟
كيف اليد تزرع الشوك اذا كانت هي الجانية؟
يمكن سقات البذور بلا ما تصفي الساقية
الكذوب و النفاق و الخيانة بالطرق الراقية
هاذي هي الدنيا و النهاية ديالها بادية
مال بن ادم غي مزروب
جاري مور السراب و الكذوب
و الحياة ماشة جارية
جمعنا فيها غي الذنوب
نفوسنا ما باغيا التوب
راها الدنيا فانية
هكذا عايشين فهاد الدنيا